रात्रीतून ४०० झाडांची कत्तल, आरे बचाव आंदोलक ताब्यात

एएमसी मिरर : वेब न्यूज 

न्यायालयाच्या निर्णयनंतर कारशेडच्या जागेवरील झाडे तोडायला शुक्रवारी रात्रीच सुरुवात झाली आहे. रात्रीतून जवळपास चारशेहून अधिक झाडे तोडण्यात आल्याचे सांगण्यात येत आहे. वृक्षतोडीची माहिती समजाताच अनेक पर्यावरणप्रेमी कारशेडच्या बाहेर विरोधासाठी जमले. त्यांनी बाहेर रस्त्यावरच ठिय्या दिला. ‘आरे’मध्ये रात्रभर पोलीस आणि आंदोलकामध्ये घमसाण झाले. अखेर आंदोलन शांत करण्यासाठी पोलिसांनी आंदोलकांना ताब्यात घेतलं आहे.

आरे कारशेडच्या ठिकाणी मोठ्या प्रमाणात पोलीस तैनात करण्यात आले आहेत. उच्च न्यायालयाच्या निकालावर सर्वोच्च न्यायालयात जाण्याची तयारी सुरू असताना ही घटना घडल्यामुळे पर्यावरण प्रेमींना धक्काच बसला आहे. दरम्यान, वृक्ष प्राधिकरणाचा निर्णय महापालिकेच्या वेबसाईटवर शुक्रवारी संध्याकाळी प्रसिद्ध करण्यात आला होता.