'उन्नाव'चा निषेध : दिल्लीत निदर्शकांवर पाण्याचा मारा; अनेक जखमी


एएमसी मिरर वेब टीम
नवी दिल्ली :
उन्नावमधील बलात्कार पीडितेच्या मृत्यूनंतर देशभरातून संतप्त भावना व्यक्त होत असून लखनऊपासून दिल्लीपर्यंत निदर्शने करण्यात येत आहेत. आज सायंकाळी महिला सुरक्षेवर बोट ठेवत दिल्लीत राजघाट ते इंडिया गेटपर्यंत 'कँडल मार्च' काढण्यात आला. यावेळी पोलिसांनी निदर्शकांना रोखण्याचा प्रयत्न केला असता त्याला निदर्शकांनी प्रतिकार केल्याने तणावाचे वातावरण निर्माण झाले. दिल्लीत आधीच कडाक्याची थंडी असताना पोलिसांनी निदर्शकांवर थंड पाण्याचा मारा केल्याने अनेक महिला बेशुद्ध पडल्याची माहिती हाती येत आहे. काही महिला जखमी झाल्या असल्याचेही सांगण्यात येत आहे.
राजघाट ते इंडिया गेटपर्यंत निघालेला 'कँडल मार्च' रोखण्यासाठी पोलिसांनी बॅरिकेड्स लावले होते. मात्र निदर्शकांनी हे अडथळे ओलांडण्याचा प्रयत्न केल्याने पोलीस व निदर्शकांमध्ये झटापट झाली. महिलांच्या हातात निषेधाचे फलक होते. 'वुई वाँट जस्टिस' अशा घोषणा निदर्शकांकडून देण्यात येत होत्या. दिल्ली महिला आयोगाच्या अध्यक्षा स्वाती मालवीय यांच्या नेतृत्वाखाली हा कँडल मार्च काढण्यात आला. स्वाती मालवीय राजघाटावर आमरण उपोषणाला बसल्या होत्या व आजच्या 'कँडल मार्च'मध्ये त्या सहभागी झाल्या आहेत.
निदर्शकांनी बॅरिकेड्स तोडल्यानंतर स्थिती नियंत्रणाबाहेर जाऊ नये म्हणून पोलिसांनी जमावाला पांगवण्यासाठी पाण्याचा मारा केला. ऐन कडाक्याच्या थंडीत पोलिसांकडून अशाप्रकारे पाण्याचा मारा करण्यात आल्याने निदर्शक अधिकच संतप्त झाले. पोलिसांशी झालेल्या झटापटीत काही निदर्शक महिला जखमी झाल्या असल्याची माहिती हाती येत आहे.
दरम्यान, दिल्लीतील 'कँडल मार्च'आधी आज सकाळी लखनऊमध्येही काँग्रेस कार्यकर्त्यांनी रस्त्यावर उतरून संतप्त निदर्शने केली. तिथेही निदर्शनांना हिंसक वळण लागले. पोलिसांनी निदर्शकांवर लाठीमार केल्याने तिथे तणावाचे वातावरण होते. दुसरीकडे समाजवादी पक्षाचे अध्यक्ष आणि उत्तर प्रदेशचे माजी मुख्यमंत्री अखिलेश यादव यांनीही विधानसभेबाहेर सांकेतिक धरणे आंदोलन करून उन्नावच्या घटनेचा निषेध केला.

Post a Comment

Previous Post Next Post